Laugardaginn 19. nóvember síðastliðin var 66. formannaráðsfundur Kvenfélagasambands Íslands (KÍ) haldinn í Kvennaheimilinu Hallveigarstöðum.

Formannaráð fer með æðsta vald um málefni KÍ milli landsþinga KÍ sem haldin eru á þriggja ára fresti. Á fundinn mæta formenn og fulltrúar héraðssambanda KÍ ásamt stjórnarkonum KÍ.

Yfirskrift fundarins var: Hvernig getum við haft meiri áhrif á samfélagið?

Ásamt venjubundnum fundarstörfum var farið yfir ný lög er varða almannaheillaskrá ásamt því að unnið var í hópavinnu um yfirskrift fundarins.  

Á fundinum var eftirfarandi ályktun lögð fram og samþykkt.

66. formannaráðsfundur Kvenfélagasambands Íslands haldinn á Hallveigarstöðum 19. nóvember 2022 hvetur fjölskyldur til þess að gefa sér tíma, ræða saman og eiga gæðastundir án truflana frá netmiðlum. 

Í umhverfi okkar er gríðarlegt áreiti af samfélagsmiðlum sem sofa aldrei og gefa aldrei grið.  Stafrænt ofbeldi, áreitni, notkun samfélagsmiðla, fíkn og kvíði hefur farið stigvaxandi ár frá ári sem hefur ófyrirséðar afleiðingar fyrir líðan og heilsu barna og fullorðinna.

Aldrei hefur verið jafn mikil þörf og í dag, að gefa sér tíma til þess að njóta samverustunda með þeim sem okkur þykir vænt um, borða saman í rólegheitum og eiga gott samtal. 

Heiðursfélagar KÍ, núverandi og fyrrverandi stjórnar- starfs- og nefndarkonur sambandsins, formenn héraðssambanda KÍ og kvenfélagskonur, eru boðnar velkomnar eftir því sem húsrúm leyfir.

Boðið verður uppá kaffiveitingar

Séra Helga Soffía Konráðsdóttir flytur hugvekju

Sigríður Víðis Jónsdóttir les upp úr bók sinni: Vegabréf: íslenskt

Tónlistaratriði

Munið happadrættið

Hlökkum til að sjá þig,

Með kveðju,

stjórn Kvenfélagasambands Íslands

Söfnun og sáning á birkifræi 2022

Verkefnið Söfnun og sáning á birkifræi er samstarfsverkefni Landgræðslunnar og Skógræktarinnar og hófst árið 2020. Að baki verkefninu stendur öflugur samstarfshópur fyrirtækja og frjálsra félagasamtaka, þar á meðal Kvenfélagasamband Íslands, ásamt stofnununum tveimur.

Nú hafa stjórnvöld sett sér það markmið að við lok ársins 2030 hafi heildarútbreiðsla birkis náð 5% af flatarmáli landsins sem er ríflega þreföldun á núverandi útbreiðslu. Þetta er liður í alþjóðlegu átaki, svokallaðri Bonn-áskorun, um aukna útbreiðslu skóga í þágu náttúrunnar og samfélaga fólks.

Verkefnið Söfnun og sáning á birkifræi hefur ekki eingöngu það markmið að efla útbreiðslu birkis. Reynslan hefur sýnt að þátttaka almennings og skilningur á mikilvægi landbótaaðgerða er lykillinn að árangri. Verkefnið gefur almenningi færi á að leggja sitt af mörkum til landbótastarfs og stuðlar þannig að auknum skilningi á mikilvægi landbótastarfs í baráttunni gegn loftslagsbreytingum.

Verkefnið 2022 er hafið

Þann 22. september síðastliðinn hófst verkefnið formlega þetta árið í Garðsárreit í Eyjafjarðarsveit. Ein og hálf milljón fræja safnaðist þann dag.

Upplýsingar um þá viðburði sem hafa verið og eða eru framundan má finna á t.d. á www.skogur.is

Til þess að vel takist til er þátttaka samtaka á borð við Kvenfélagasambandið lykilatriði. Kvenfélög um allt land eru því hvött til að efna til viðburða og hefja frætínslu eða hvetja félagsmenn og fjölskyldur að að gefa sér stund til að tína fræ. Skila má fræinu á tilgreindum söfnunarstöðum eða finna sáningarstaði í samráði við sveitarfélög eða landeigendur og koma fræinu strax i jörð svo upp vaxi nýr birkiskógur.

Nú í haust er enn efnt til söfnunar og sáningar á birkifræi. Til þess að vel takist til er þátttaka samtaka á borð við Kvenfélagasambandið lykilatriði. Kvenfélög um allt land eru því hvött til að efna til frætínslu og annað hvort skila fræinu á tilgreindum söfnunarstöðum eða finna sáningarstaði í samráði við sveitarfélög eða landeigendur og koma fræinu strax i jörð svo upp vaxi nýr birkiskógur.

Hafður er sá háttur á að öll fræ sem fara í söfnunarkassa hjá Olís og Bónus eru mæld út frá rúmmáli en þannig fæst fjöldi fræja sem safnast en í einum lítra af þokkalega hreinsuðum fræjum eru um 90 þúsund fræ.  Það er því auðvelt fyrir hvern og einn áætla fjölda fræja sem safnast á hverjum stað.

Ítarlegar upplýsingar um verkefnið er að finna á vefsíðunni www.birkiskogur.is. Þar eru meðal annars leiðbeiningar um hvernig best er að bera sig að við bæði söfnun á birkifræi og sáningu.

Það voru 18 hressar konur+ 4 makar sem mættu frá Íslandi á Evrópuþing ACWW (Associated Country Women of the World - Alþjóðasamband dreifbýliskvenna) sem haldið var í Glasgow dagana 19. - 23. september 2022 sl. Þátttakendur á þinginu voru 130 alls frá 9 löndum og var  ánægjulegt að sjá svona góða þátttöku frá Íslandi. Dagskráin var fjölbreytt með blöndu af fundum, fyrirlestrum, skoðunarferðum og kvöldskemmtunum. Dagmar Elín Sigurðardóttir forseti KÍ flutti skýrslu Íslands á þinginu. Aðeins tvær úr hópnum höfðu áður mætt á þing ACWW, þær Helga Guðmundsdóttir og Mjöll Einarsdóttir. Ánægjulegt að svo margar voru tilbúnar að mæta frá Íslandi og kynnast þannig alþjóðastarfinu.  Næsta þing ACWW er heimsþing sem haldið verður í Kuala Lumpur í Malasíu í mái 2023.   Sjá hér nánar hér

Frá vinstri standandi: Helga Guðmundsdóttir fyrrum forseti KÍ, Jenný Jóakimsdóttir starfsm KÍ, Katrín Ragnheiður Guðmundsd. frá Kvenfélaginu Iðunni Eyjafjarðarsveit, Dagný Hildur Þorgeirsdóttir frá Kvenfélaginu Einingu Skagaströnd, Árný Ósk frá Einingu Skagaströnd, Dagmar Elín Sigurðardóttir forseti KÍ, Jóhanna Bára Þórisdóttir frá Iðunni Eyjafjarðarsveit, Unnur Ósk Kristjónsdóttir frá Kvenfélaginu Eyrarbakka, Lena Jónsdóttir gjaldkeri KÍ og Guðný Rannveig Reynisdóttir frá Kvenfélaginu Eyrarbakka, Sitjandi frá vinstri: Björg Bjarnadóttir frá Kvenfélaginu Vonin Blönduósi, Mjöll Einarsdóttir Kvenfélagi Selfoss, Eyrún Olsen Kvenfélagi Selfoss, Þuríður Jóna Schiöth Iðunni Eyjafjarðarsveit, Hrönn Arnheiður Björnsdóttir Iðunni Eyjafjarðarsveit og Ásta Heiðrún Stefánsdóttir Iðunni Eyjafjarðarsveit.   

Á myndina vantar: Guðnýju Nönnu Þórsdóttur og Elínu Ósk Ómarsdóttur báðar frá Einingu Skagaströnd. 

Fleiri myndir frá þinginu er að finna á facebook síðu KÍ  Smelltu hér

Út er komið 3ja tölublað Húsfreyjunnar sem er jafnframt fyrsta tölublað nýs ritstjóri Húsfreyjunnar Sigríðar Ingvarsdóttur.    

Í blaðinu að þessu sinni er að finna einlægt viðtal við Tinnu Jóhannsdóttur framkvæmdastjóra Skógarbaðanna í Eyjafirði en Tinna tók nýverið u-beygju í lífinu og flutti norður til að stýra uppbyggingu Skógarbaðanna sem voru formlega opnuð í maí síðastliðnum. 

Í þessu tölublaði er rætt við þær Þuríði Pétursdóttur og Þuríði Helgu Jónasdóttur um Verðandi, endurnýtingarmiðstöð á Hofsósi. Megintilgangur Verðandi er að stuðla að endurnýtingu hluta og fatnaðar. Hugmyndafræði sem byggð er á hringrásarhagkerfinu og sjálfbærni.Sagt er frá Norrænu sumarþingi kvenfélagskvenna sem haldið var í Reykjanesbæ í sumar í bæði máli og myndum.  Lesendur fá síðan að njóta smásögu Jónínu Leósdóttur “Löglega afsökuð”.

Við fáum síðan að kynnast WIFT sem er Félag kvenna í kvikmyndum og sjónvarpi á Íslandi. Guðríður Gyða Eyjólfsdóttir sem er einn færasti sveppafræðingur landsins fræðir lesendur um sveppatínslu og kynnir algengustu matsveppina.

Hannyrðahornið er á sínum stað og að þessu sinni er það Sjöfn Kristjánsdóttir sem gefur lesendum þrjár uppskriftir til þess að prjóna á börnin í haust, en það er Ynja barnapeysa, Vera húfa og Mugison vettlingar. Sjöfn gaf út prjónabókina UNA Prjónabók árið 2020 í samstarfi við Sölku sól Eyfeld.

Matarþátturinn hans Alberts Eiríkssonar er að þessu sinnu helgaður úkraínskri veislu hjá Alexöndru Chernyshova sem gefur lesendum uppskriftir að Borsh, Pampúshki, Veraniki og Hunangsköku sem eflaust verður fróðlegt að spreyta sig á.

Prjónagleðin á Blönduósi fær pláss í blaðinu og rætt um verkefnið Plastlaus September og Leiðbeiningastöð heimilanna gefur góð ráð um hvernig við getum minnkað að plastið í fötunum okkar losi milljónir af örplasti út í umhverfið.

Sagt er frá tónlistarkonunni Fanneyju Kristjánsdóttur sem núverið gaf út sína aðra sólóplötu, en Fanney syngur undir listamannsnafninu Kjass.

Allt þetta, að sjálfsögðu krossgátan og meira til í nýjasta tölublaði Húsfreyjunnar sem Sigríður Ingvarsdóttir ritstýrir nú í fyrsta sinn.    

Húsfreyjan fæst í lausasölu í verslunum viða um land

Smelltu hér til að skrá þig í áskrift.  Þú getur valið um að fá blaðið á prenti eða skráð þig fyrir rafrænni áskrift.  Allir áskrifendur hafa aðgang að áskriftarvef Húsfreyjunnar og hafa þar takmarkalausan aðgang að fjölda eldri tölublaða.