Í tilefni sumars er Húsfreyjan stútfull af efni og uppskriftum að mat og handavinnu sem tengjast sumri. Húsfreyjan hvetur okkur til að njóta samveru, matar og íslenska sumarsins.

Á forsíðunni er hún Kristín Le, sem kom til Íslands sem flóttabarn frá Víetnam. Ritstjóri Húsfreyjunnar settist niður með Kristínu. Kristín segir sína sögu og gefur að auki lesendum góð ráð og ljúffengar uppskriftir frá Víetnam, sem myndu sóma sér vel í sumarboðinu. Í dag miðlar hún sinni þekkingu í gegnum námskeið og samfélagsmiðla. Markmið hennar er að kenna fólki að borða án boða og banna.

Ritstjóri ræddi einnig við Hraundísi Guðmundsdóttur, sem er skógfræðingur, ilmolíufræðingur og frumkvöðull á Hvanneyri. Hún fór alla leið til Arizona til að læra að eima íslenskar plöntur til að gera ilmkjarnaolíur. Ilmkjarnaolíur sem eru líkt og skógarbað í flösku. Hraundís fræðir okkur um mismunandi eiginleika ilmkjarnaolíanna sem hún framleiðir.

Read More

Í tilefni 100 ára afmælisins buðu kvenfélagskonur í Kvenfélagi Álftaness, bæjarbúum og öðrum gestum í kaffisamsæti í Lambamýri sem er ný félagsmiðstöð aldraðra á Álftanesi á kosningadaginn 16. maí síðastliðin.

Boðið var upp á kaffi og kökusneið. Fjölmargir mættu, meðal annars bæjarstjóri Garðabæjar, Almar Guðmundsson og sýndu þannig Kvenfélaginu virðingu og þakklæti fyrir það starf sem félagið vinnur í samfélaginu.

Guðrún Brynjólfsdóttir, formaður Kvenfélagsins var þar uppáklædd í þjóðhátíðarkyrtil félagsins. Kyrtillinn var vígður á 17. júní 1989.  En á þeim tíma hét félagið Kvenfélag Bessastaðahrepps, Þegar nafni Bessastaðahrepps var formlega breytt þann 17. júní 2004 í Sveitarfélagið Álftanes var nafni kvenfélagsins einnig breytt og hefur félagið verið kennt við Álftanes upp frá því.  Félagið var stofnað á Bessastöðum 25. apríl 1926.  Fyrsti formaður var Elín Vigfúsdóttir, húsfreyja á Bessastöðum.

Til gamans má geta að í nóvember 1980 gekk forseti Íslands, frú Vigdís Finnbogadóttir, í kvenfélagið. Eliza Reid gekk svo í félagið þegar maður hennar Guðni Th. Jóhannesson var forseti.

Áður höfðu þær haldið upp á afmælið á afmælisdaginn 25. apríl í boði á Bessastöðum, þar sem frú Halla Tómasdóttir, forseti Íslands tók á móti félagskonum.

Hamingjuóskir enn og aftur með 100 árin!

Formaður Kvenfélags Álftaness, Guðrún Brynjólfsdóttir og Dagmar Elín Sigurðardóttir, forseti Kvenfélagasambands Íslands.

Kvenfélagskonur taka á móti bæjarstjóranum, Almari Guðmundssyni.

Heiðursfélagi Kvenfélags Álftaness, Elín Jóhannsdóttir og formaður Guðrún Brynjólfsdóttir.

Tvær nýjar konur voru kosnar í stjórn Kvenfélagasambands Íslands á 73. formannaráðsfundi sem haldin var á Hótel Vesturlandi í Borgarnesi helgina 27. - 28. febrúar 2026.

Hildur Traustadóttir, úr Kvenfélaginu 19. júní á Hvanneyri var kosin ritari KÍ til næstu þriggja ára. Hildur hefur verið félagi í Kvenfélaginu 19. júní frá árinu 1995. Áður var hún í Kvenfélagi Ljósvetninga, en í það gekk hún aðeins 19 ára gömul og var formaður þess um tíma. Hún átti þá einnig sæti í stjórn Sambands þingeyskra kvenna. 

Ragna Guðmundsdóttir var kosin í varastjórn KÍ til næstu þriggja ára. Ragna kemur úr Félagi kvenna í Kópavogi, sem hún hefur verið í frá stofnun þess 2019. Ragna er einnig núverandi formaður Kvenfélagasambands Kópavogs. 

Velkomnar í stjórn kæru konur. 

Magðalena K. Jónsdóttir, gjaldkeri. Dagmar Elín Sigurðardóttir, forseti. Hildur Traustadóttir, nýkjörin ritari. Ragna Guðmundsdóttir, nýkjörin í varastjórn. Eva Björk Harðardóttir, varaforseti og Rósa Marinósdóttir, meðstjórnandi. á myndina vantar Helgu Guðmundsdóttur, varastjórnarkonu sem ekki átti heimangengt á fundinn.

73. formannaráðsfundur Kvenfélagasambands Íslands haldinn í Borgarnesi 27. – 28. febrúar 2026.

Skorar á stjórnvöld að hrinda í framkvæmd 14. grein í stjórnarsáttmála ríkisstjórnar sem fjallar m.a. um að auka  fjárfestingu sem styrkir stoðir heilbrigðis- og öldrunarþjónustu um land allt og að leiða þjóðarátak í umönnun eldra fólks, m.a. fjölga hjúkrunarrýmum og efla heimahjúkrun, og vinna að þjóðarmarkmiði um fastan heimilislækni fyrir alla landsmenn.

Fyrsta tölublað Húsfreyjunnar 2026 er komið út.

Að venju er blaðið stútfullt af áhugaverðu efni. Í forsíðuviðtali að þessu sinni er Helena Hólm, hárgreiðslumeistari, ferðaþjónustubóndi og geitahirðir. Helena tók algjöra u-beygju í lífinu á miðjum aldri, þegar hún ásamt manni sínum lét gamlan draum rætast og gerast bóndi í Flóahreppi.

Fjallað er um nýútkomna bók, Ástarkraft, sem þær Berglind Rós og Silja Bára ritstýra. Berglind Rós ræddi við ritstjóra Húsfreyjunnar um bókina sem gefin er út af Hinu íslenska ástarrannsóknarfélagi í samstarfi við Háskólaútgáfuna.

Margrét Skúladóttir sem er forsprakkinn að stofnun Þjóðbúningafélags Vestfjarða er í viðtali og segir meðal annars frá því að síðan félagið var stofnað hafi yfir 200 búningar verið saumaðir á Vestfjörðum.

Nýr umsjónaraðili Hannyrðahornsins, Lára Magnea Jónsdóttir textílhönnuður, býður upp á uppskrift að afgangatrefli og skemmtilegum útsaum á púða.

Leiðbeiningastöð heimilanna gefur góð ráð um þrif og gátlista fyrir skipulögð þrif.

Smásagan að þessu sinni er eftir Eyrúnu Ósk Jónsdóttur og nefnist Óhræsið. Sagan var ein af þeim sem var valin til birtingar í síðustu Smásagnasamkeppni Húsfreyjunnar.

Húsfreyjan ræðir við Stellu Ingibjörgu Leifsdóttur Nielsen, eiganda verslunarinnar Belladonna. Hún ræðir hvernig það kom til að hún hóf rekstur og áskoranir í rekstri og persónulega lífinu.

Hulda Brynjólfsdóttir skrifar um Ullarvikuna á Suðurlandi sem hefur verið haldin árlega á Suðurlandi frá árinu 2021. Ullarvikan færir lesendum einnig uppskrift að Ullarvikuhúfunni 2026, sem lesendur geta byrjað að prjóna.

Í blaðinu er umfjöllun um Ár kvenna í landbúnaði en Sameinuðu þjóðirnar hafa tilnefnt árið 2026 sem ár kvenna í landbúnaði. Sagt er frá verkefni Alþjóðasambands dreifbýliskvenna á Indlandi en aðalmarkmið verkefnisins var að innleiða sjálfbærar ræktunaraðferðir til að tryggja bændasamfélögum tryggara lífsviðurværi.

Í Matarþætti Húsfreyjunnar sem Albert Eiríksson sér um, gefa fyrrum skólastúlkur úr Hússtjórnarskólanum á Varmalandi gómsætar uppskriftir sem þær báru fram í dömuboði. Þar má meðal annars finna uppskriftir eins og Sous Vide lambalæri, rækjukokkteil með avókadó og mangó, tengdamömmueplakaka og kaffifrómas.

Ritstjóri Húsfreyjunnar ræddi við Sigrúnu Jónsdóttur, ADHD-markþjálfa um ADHD á kvennamáli. Hún ræðir meðal annars um seinar greiningar kvenna, hormóna og ADHD og bjargráð og leiðir til betra lífs þrátt fyrir greiningu.

Þorsteinn Gunnar Jónsson (Doddi), bókasafnsvörður og starfsmaður á Amtsbókasafninu á Akureyri, segir frá starfi safnsins en safnið heldur upp á 200 ára afmæli á næsta ári. En bókasöfn hafa breyst mikið í áranna rás og eru nú miklu meira en bara safn til að fá lánaðar bækur, þau eru orðin að samfélagsmiðstöðvum þar sem allir eru velkomnir.

Eins og venjan er í febrúarblaði Húsfreyjunnar gefum við kvenfélögunum sérstakan gaum, en þau hafa verið dugleg að senda inn efni í blaðið. Meira efni frá kvenfélögunum mun birtast í næstu tölublöðum.

Krossgátan er svo að sjálfsögðu á sínum stað. Fullt af fjölbreyttu efni til að lesa og njóta.

Njóttu lestursins.

Húsfreyjan fæst bæði í áskrift og í lausasölu í verslunum víða um land.

Vertu með í hópi ánægðra áskrifenda.