Kvenfélagasamband Íslands

Konur og kvenfélög á Norræna skjaladeginum 14. nóvember

Opið hús í Þjóðskjalasafni Íslands, laugavegi 162

Þema skjaladagsins í ár á Íslandi er „Konur og kvenfélög“ en Félag héraðsskjalavarða ásamt Kvenfélagasambandi Íslands hefur staðið fyrir átaki á söfnun skjala kvenfélaga um land allt. Á vef skjaladagsins www.skjaladagur.is er sýnishorn af þeim skjölum sem kvenfélög víða um land hafa afhent á héraðsskjalasöfn auk ýmissa annarra skjala sem tengjast konum og hagsmunabaráttu þeirra.

Borgarskjalasafn Reykjavíkur, Héraðsskjalasafn Kópavogs og Þjóðskjalasafn Íslands verða með sameiginlegt opið hús á Norrænum skjaladegi laugardaginn 14. nóvember 2009. Opna húsið verður í húsakynnum Þjóðskjalasafns að Laugavegi 162, kl. 11.00 til 15.00. Aðgangur er ókeypis og allir velkomnir, börn jafnt sem fullorðnir.

Söfnin verða með sýningar á skjölum sem tengjast þema dagsins "Konur og kvenfélög", boðið verður upp á spennandi fyrirlestra og kynningar á vefum, kaffiveitingar, fræðslu og sitthvað verður gert fyrir börnin. Aðgangur er ókeypis og allir velkomnir.

KÍ fagnar nýjum formanni BSRB, Elínu Björgu Jónsdóttur

Stjórn Kvenfélagasambands Íslands færði á dögunum Elínu Björgu Jónsdóttur
nýjum formanni BSRB blómvönd í tilefni af því að hún er fyrsta konan sem gegnir
formennsku í samtökunum. Kvenfélagasamband Íslands hefur ávallt lagt áherslu á að
konur sinni ábyrgðarstörfum í þjóðfélaginu og minnir á ályktun sína þess efnis frá 31. janúar sl.

Frá vinstri: Una María Óskarsdóttir, varaforseti KÍ, Hildur Helga Gísladóttir, framkvæmdastjóri KÍ, Sigurlaug Viborg, forseti KÍ, Eygló Guðjónsdóttir forstöðumaður Leiðbeiningarstöðvar heimilanna og Elín Björg Jónsdóttir formaður BSRB.

Magnús Steinarsson verkefnisstjóri hjá VÍS orti vísu í tilefni þess að Elín Björg tók við formennskunni og er hún birt hér með góðfúslegu leyfi hans.

Karla sigrar kvennaher,
konan lengur lifir.
Veröld ekki versnar hér,
völdin flytjast yfir.

Fréttir af morgunverðarfundi Náum áttum

Fundarefni var: Aukið framboð á kannabis og ranghugmyndir ungs fólks um skaðsemi kannabisreykinga

Fullt var út úr dyrum á morgunverðarfundi Náum áttum hópsins s.l. þriðjudag þegar fjallað var um kannabis - umfang þess og afleiðingar.

110 ára afmæli Marttalitto í Finnlandi

110 ára Ævintýri

Kvenfélagasambandið Marttalitto, sem hefur á að skipa u.þ.b. 40.000 konum héldu upp á 110 ára afmæli sambandsins núna 10.10.2009. Í því tilefni var formönnum allra Norðurlanda-samtakanna boðið að vera viðstaddir mikil hátíðahöld. Og þá meina ég að bjóða, því þær greiddu allan ferðakostnað, gistingu og uppihald þá tvo sólarhringa sem ferðin tók gestina.

Fundur KÍ á Hallveigarstöðum um finnsk kvenfélög.

Petra Högnäs frá FINNLANDS SVENSKA MARTHAFÖRBUND í Finnlandi sem nú stödd hér á landi var gestur á fundi Kvenfélagasambands Íslands á Hallveigarstöðum 24. september sl.
Petra sagði frá starfssemi Marthaförbundets og verkefni sínu innan þess sem er að fá fleiri konur til liðs við kvenfélögin. Petra sem talar góða íslensku svaraði einnig fyrirspurnum fundargesta.

FINNLANDS SVENSKA MARTHAFÖRBUND er fyrir sænskumælandi Finna í Finnlandi, sem eru um 5% finnsku þjóðarinnar eða um 300.000. Marthaförbundet er sambærilegt Kvenfélagasambandi Íslands og hefur um 10.000 félagskonur í 450 kvenfélögum sem mynda 13 héraðssambönd. Marthaförbundet er treyst fyrir miklu menntunarstarfi í finnsku samfélagi og hefur eru 16 starfsmenn í 12-13 stöðugildum. Frekari upplýsingar um Marthaförbundet er að finna á heimasíðu samtakanna http://www.marthaforbundet.fi