Haustblað Húsfreyjunnar er komið út og ætti nú að vera að detta inn um lúgurnar hjá áskrifendum.

Að venju er blaðið stútfullt af góðu lesefni.

Aðalviðtalið að þessu sinni er við Dóru Guðrúnu Guðmundsdóttur, sviðsstjóra hjá landlæknisembættinu og doktor í sálfræði, en hún hefur sérhæft sig í hamingjurannsóknum. Dóra Guðrún ræðir meðal annars um veru sína í klaustri í Suður-Frakklandi, mikilvægi félagslegra tengsla, lýðheilsuáskoranir unga fólksins og hamingjurannsóknir.

Bjargey Anna Guðbrandsdóttir ræðir við Húsfreyjuna um fyrirtækið sitt Píkusaum og sína sýn á femíníska handverksbyltingu.

Drífa Snædal talskona Stígamóta settist niður með ritstjóra og sagði frá starfi Stígamóta í tilefni 35 ára afmælis samtakanna, ásamt því að ræða um eilífa baráttuna gegn kynbundnu ofbeldi.

Að þessu sinni eru tvær smásögur í blaðinu. Síðbúinn gestur eftir Sigríði Helgu Sverrisdóttur og íslenskur dagur á Kanarí eftir Elínu Konu Eddudóttur.

Albert Eiríksson skellti sér ásamt Sillu ljósmyndara í Söngskólann í Reykjavík. Hluti af kennurum skólans útbjó girnilega rétti fyrir Húsfreyjuna, sem finna má uppskriftir að í Matarþættinum.

Frumkvöðlarnir, Marta Schluneger og Þórey Rúnarsdóttir, segja frá fyrirtækinu sínu FLÍK en þær hafa hannað smáforrit fyrir prjónasamfélagið.

Rakel Adolphsdóttir, fagstjóri Kvennasögusafns deilir með lesendum dýrmætum dagbókum kvenna og minnir í leið á mikilvægi þess að geyma vel gögn sem gætu veirð dýrmæt seinna meir. 

Í blaðinu er umfjöllun um vitundarvakningu Kvenfélagasambands Íslands og kvenfélaganna gegn einsemd og einmanaleika. En Vika einmanaleikans fer fram dagana 3. – 10. október. Allir sem vettlingi geta valdið eru hvattir til að taka þátt.

Kristín Örnólfsdóttir sem sér um Hannyrðahornið gefur uppskriftir að prjónuðum léttum treflum og litaglöðum barnavettlingum. Kristín er líka með útsaum þar sem hún gefur lesendum hina klassísku setningu Heima er best í nýrri útfærslu.

Bryndís Fjóla Pétursdóttir segir frá lífi sínu í fróðlegu viðtali, en Bryndís lýsir sjálfri sér sem „fornkvendi, frumbyggju og völvu“. Hún ræðir meðal annars um Huldustíginn í Lystigarðinum á Akureyri, mótvægiskubb sem hún hefur hannað og tilraunir sínar með tilfinningar í vatni.

Krossgátan er svo að sjálfsögðu á sínum stað í blaðinu ásamt ýmsu öðru áhugaverðu efni.

Njótið lestursins.

Smelltu hér til að skrá þig í áskrift.

Vinnum saman gegn einmanaleika 

Vika einmanaleikans verður dagana 3. til 10. október næstkomandi. 

Vika einmanaleikans er vitundarvakning Kvenfélagasambands Íslands gegn einsemd og einmanaleika. Verkefninu er ætlað að opna á umræðu um einmanaleika í samfélaginu, upplýsa almenning um orsakir og afleiðingar, hvetja til aðgerða og efla samtakamátt í þjóðfélaginu gegn einmanaleika. Styrktaraðilar verkefnisins eru félags- og húsnæðismálaráðuneytið og Lýðheilsusjóður.

Við hvetjum alla sem vettlingi geta valdið að leggja höfuðið í bleyti og skipuleggja viðburði sem snúa að góðri samveru og samtali.

Read More

Fyrirpartý sem haldið var í tilefni 110 ára afmælis kosningaréttar kvenna og Kvennaárs þann 19. júní síðastliðinn var haldið í Kvennaheimilinu Hallveigarstöðum af þeim þremur félögum sem eiga saman og reka Hallveigarstaði. Fyrirpartýið var vel sótt og glöddust konur saman með kleinum, kaffi og búbblum áður en haldið var fylktu liði niður í Hljómskálagarð þar sem fór fram Kvennavaka og stórtónleikar sem skipulagðir voru af Kvennaári 2025. Það er mikilvægt að fagna merkum áföngum og konur kunna það svo sannarlega ásamt því að eiga saman góða samveru og efla þannig baráttuandann í jafnréttismálunum. á stórtónleikunum komu fram Bríet, Reykjavíkurdætur, Heimilistónar, Countess Malaise og Mammaðín. kvöldinu lauk með fjöldasöng undir stjórn Guðrúnar Árnýjar. Kynnar Kvennavöku voru Sandra Barilli og Sindri „Sparkle“. Frábært kvöld í alla staði og þökkum við öllum fyrir komuna.

Meðfylgjandi eru nokkrar myndir frá deginum/kvöldinu. 

Jenný Jóakimsdóttir, Helga Magnúsdóttir, Dagmar Elín Sigurðardóttir, Guðrún Þórðardóttir og Auður Önnu Magnúsdóttir hjá KRFÍ

Boðið var haldið í anddyri og garði Hallveigarstaða og boðið upp á Kaffi, kleinur og búbblur.  Fullt var út úr húsi af konum sem voru á leið á tónleikana. 

Bríet heillaði kvennaskarann með söng sínum og framkomu

Kynnar Kvennavöku voru Sindri "Sparkle" og Sandra Barilli

Countess Malaise

Ljósmynd: Sunna Ben