Hátt á annað hundrað manns, konur og karlar, lagði leið sína í Kvennaheimilið Hallveigarstöðum í dag á alþjóðlega beinverndardeginum.
Tilefnið var að fræðast um beinheilsu. Halldóra Björnsdóttir flutti fræðsluerindi um beinþynningu og forvarnir og hægt var að láta mæla hjá sér beinþéttni. Mjólkursamsalan, aðal styrktaraðili Beinverndar, bauð uppá kalríkar veitingar, osta, ostakökur og ýmiskonar skyr og próteindrykki.
Kvenfélagasambandið þakkar Beinvernd samstarfið og gestunum fyrir komuna og hvetur fólk til að huga að beinheilsu sinni og taka áhættupróf um beinþynningu sjá hér
Fréttir
Í tilefni af alþjóðlegum beinverndardegi verður Beinvernd með opið hús í samstarfi við Kvenfélagasamband Íslands að Hallveigarstöðum, Túngötu 14, 101 Reykjavík.
Flutt verður fræðsluerindi um beinþynningu og forvarnir kl. 14:00 og spurningar/umræður á eftir. Erindið verður síðan endurflutt kl. 15:00 og kl. 16:00.
Beinþéttnimælingar (ómskoðun á hælbeini) verða á milli kl. 14:30 - 17:00. Boðið verður upp á kalkríkar veitingar.
Mætum, fræðumst og höfum gaman saman.
Í þessu haustblaði er viðtal við Ástu Ragnheiði Jóhannesdóttur, þar sem hún fjallar um hundrað ára kosningaafmæli kvenna á síðasta ári og um baráttuna fyrir því að reisa styttu af, Ingibjörgu H. Bjarnason, fyrstu konunni sem kjörin var til Alþingis. Guðrún Þórðardóttir forseti Kvenfélagasambandsins fjallar um starf kvenfélagskvenna og sagt er frá þingi norræna kvenfélagskvenna í Vestmannaeyjum sem haldið var í sumar.
Ásdís Sigurgestsdóttir sér um handavinnuþátt Húsfreyjunnar og kynnir þar glæsilegar röndóttar lopapeysur sem án ef verða vinsælar á prjónunum í vetur. Einnig er í þættinum fallegur jólaútsaumur. Helena Gunnarsdóttir sér um matarþátt og er þar meðal annars með uppskriftir af bláberjaböku og hollum næturgraut. Sædís Ósk Harðardóttir sérkennari er í áhugaverðu viðtali þar sem bæði er fjallað um skólamál og skó og Jóhanna E. Pálmadóttir segir frá Prjónagleði á Blönduósi. Elín Káradóttir, ung kona sem býr í Hveragerði en alin upp í Hróarstungu á Austurlandi, svarar spurningum Húsfreyjunnar. Fjallað er um félagsmál og skilvirka fundi, beinvernd, frystingu matvæla og frystitæki og Evrópsku nýtnivikuna svo eitthvað sé nefnt.
Húsfreyjan kemur út fjórum sinnum ári, í mars, júní, september og nóvember og er seld í áskrift hjá Kvenfélagasambandi Ísland, This email address is being protected from spambots. You need JavaScript enabled to view it., og einnig í lausasölu. Ritstjóri Húsfreyjunnar er Kristín Linda Jónsdóttir.
Umhverfissýning FENÚR og umhverfisstofnunar undir yfirskriftinni Saman gegn sóun fer fram 9. og 10. september í Perlunni. Kvenfélagasamband Íslands og fleiri félagasamtök verða á staðnum ásamt fjölmörgum fyrirtækkjum sem taka þátt í sýningunni þar sem þau munu kynna sínar vörur og hugsjón. Markmið sýningarinnar er að efla umhverfisvitund, minnka sóun og auka endurvinnslu.
Samtökin halda ásamt Umhverfisstofnun úti vefnum matarsoun.is með fræðslu og hvatningarefni gegn matarsóun.
Sýningin opnar kl. 14.00 föstudaginn 9. sept og verður opin til kl. 18.00
kl. 14:30 flytur Sigrún Magnúsdóttir Umhverfis- og auðlyndaráðherra ávarap og setur sýninguna formlega:
Sýningin verður opin laugardag 10. september kl. 12:00-17:30.
Þetta verður sannkölluð fjölskylduupplifun.
Verið velkomin
Aðgangur er ókeypis.
110 norrænar konur tóku þátt í Norrænu sumarþingi kvenfélaga innan Nordens Kvinnoförbund, NKF, sem haldið var í Vestmannaeyjum dagana 17. -19. júní sl. Eyjarnar allar og hafið umhverfis voru vettvangur fundarins en hefðbundin fundastörf og fyrirlestrar fóru fram í AKÓGES salnum.
Á þinginu tók Guðrún Þórðardóttir forseti KÍ við formennsku í Nordens Kvinnoförbund, NKF, til næstu fjögurra ára.
Fundargestir komu til Eyja í sól og blíðu og var sigling umhverfis Eyjarnar áhrifamikil fyrir alla þátttakendurna. Líknarkonur í Vestmannaeyjum höfðu veg og vanda að skipulagningu og framkvæmd í heimabyggð og buðu þær þingfulltrúum m.a. í kvöldmat í Líknarhúsinu.
Fjölmargir áhugaverðir fyrirlestrar, tengdir þema þingsins um ”Lifað í sátt við náttúruna” voru á dagskrá þingsins og ályktað var um aðstæður fæðandi kvenna á landsbyggðinni.